Капитенот и најдобар фудбалер на Малме, Маркус Розенберг дефинитивно ќе биде во комбинација за настап во редовите на шведскиот шампион на реванш дуелот од 2. квалификациско коло за ЛШ против Вардар кој се игра во вторник, 18. јули, во Струмица.
Розенберг го пропушти првиот меѓусебен дуел на „Сведбанк арената“ поради повреда, но рехабилитацијата на најдобриот стрелец на Малме мина далеку подобро од очекувањата на лекарскиот тим на клубот.
Офанзивецот денеска ги мина комплетните тестови на лекарскиот тим, по што од утре се враќа и на активните тренинзи на клубот.
„Направивме навистина одлични тестови денеска кои Маркус одлично ги помина. Веќе е подготвен да се врати на тренинзи, а ќе биде подготвен за некој ден и за натпревари. А, дали ќе настапи на дуелот против Вардар тоа јас секако не можам да го кажам. Тоа е на тренерот на клубот“ – истакна за шведските медиуми, физиотерапевтот на Малме, Јеспер Робертсон.
Првиот натпревар меѓу Малме и Вардар во Шведска заврши без победник (1-1). „Вардарци“ имаат активен резултат кој дава сериозни надежи за пласман во следната рунда натпревари на европската сцена.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
