Македонските ракометари стигнаа до одлични „плус осум“, на мал чекор до остварување на зацртаната цел за пласман на мундијалот што следниот јануари ќе се одржи во Германија и во Данска.
Дефинитивно се повеќе наликуваме на оние „големи репрезентации“, па лесно труимфираме и во натпреварите во кои не играме со 100% од своите можности. Борко Ристовски беше одличен и ги покри и оние проблеми во одбраната со кои се соочивме, додека во нападот дефинитивно се може многу повеќе, го посочи тоа и капитенот Кире Лазаров, но и дел од останатите ракометари кои се свесни за потенцијалот на оваа репрезентација, покажан во групната фаза во Загреб од последното европско првенство. Дури и коа не игра најдобро, Македонија победува со стил, со цепелини, добри акции, голмански мајстории… а што ли ќе биде кога ќе влеземе во ритам и ќе заиграме 100% според замислите на „ел команданте“.
Се оди чекор по чекор, Раул Гонзалес многу добро знае што прави, а ваквите резултати сигурно ќе влијаат позитивно врз самодовербата, не само за реваншот туку и за мундијалските пресметки, на стартот од битките за олимписки билет за Токио.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
