Лионел Меси се повлече од репрезентацијата, па се врати назад за еден последен обид за атак на трофејот што му недостига, оној мундијалскиот. Од денешна перспектива, подобро и да не го стореше тоа бидејќи ѕвезата на Барселона доживува вистинска бламажа на овој светски шампионат.
Ако против Исланд сите топки одеа на него и можеше да се пофали барем со шутеви кон противничкиот гол, вечерва против Хрватска приказната беше поинаква. „Коцкестите“ поставија фантастична тактика со која успеаја во намерата – да го изолираат Меси и да го направат тотално безопасен кон голот на Суботиќ. Ова беше најочигледно во првото полувреме, во кое Меси имаше само 20 допири со топката, помалку дури и од голманот Кабалјеро (22), а од цела Аргентина повеќе само од Агуеро (седум).
Во второто полувреме тој беше за нијанса поактивен, но бројките се поразителни, вкупно 47 допири со топката, 23 успешни додавања и еден шут. Ако на ова се додаде дека дуелот со Хрватска беше шести мундијалски во низа на кој не успеал да постигне гол (вкупно 675 минути), јасно е за каква криза станува збор.
Допрва, по дуелот Исланд – Нигерија ќе почнеме со конкретни „математики“ што треба да се случи за Аргентина да испадне, а што за да остане дел од мундијалот, но едно е јасно, вака очајни „гаучосите“ не сме ги гледале долго, долго време.
Впрочем, ова е првпат во нивната мундијалска историја да бидат без победа на четири натпревари во низа (по 90 минути игра), а поразот од Хрватска е најубедлив за Аргентина во групната фаза од мундијалите уште од 1958 година.
Селекторот Сампаоли направи катастрофален избор на патници за Русија, а потоа сета своја надеж ја положи во Меси. Само што, асот на Барса не е Бог, туку обичен смртник кој не може сам против сите.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
