Македонскиот репрезентативец Илија Несторовски беше стрелец за Удинезе на гостувањето против Салернитана во 37. коло од Серија А кое заврши со пресврт победа на домашната екипа од 3-2 по гол во 96. минута.
Несторовски во финишот од сезоната доби конечно вистинска шанса во тимот на Удинезе, и квалитетните изданија ги заокружува и со гол во претпоследното коло од италијанското првенство.
Македонскиот напаѓач погоди од непосредна близина во 30. минута, на асистенција на Переира, за водство од 0-2 во тие моменти на Удинезе. За Несторовски ова е втор гол сезонава за тимот од Удине.
Сепак, домашните со два гола, на Кастанос во 43. минута и Кандрева во 57. минута најпрво дојдоа до 2-2, а потоа во 96. минута Нигериецот Трост-Еконг погоди за победа од 3-2 на Салернитана.
Враќањето на Несторовски во вистинска форма е повеќе од значајно и за селекторот Боби Милевски и македонската репрезентација, посебно ако се знае дека повторно националниот тим ќе има проблеми со креација на нападот по повредата на Бојан Миовски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
