Пелистер им се врати на победите во Првата кошаркарска лига откако во натпреварот на 18. коло славеше против Еуро Никел со 92-74. Битолчани беа на врвот на својата задача во реализацијата од поле, постигнаа 54 поени во противничкиот рекет, рано стигнаа до двоцифрена предност која беше преголем залак за кавадарчани и покрај налетот во вториот дел од мечот.
Еуро Никел го започна натпреварот со две тројки во низа за предност од 2-6, но Пелистер не дозволи рано водство на гостинскиот тим. Добриот проток на топката во нападот носеше лесни поени за „зелено-белите“ преку кои до крајот на четвртината успеаја и да поведат со 24-18. Избраниците на Илиевски продолжија да го диктираат темпото и до крајот на полувремето, преку Силаџи стигнаа до првото двоцифрено водство (30-20), а добрата игра на двата дела од теренот ја задржа предноста од 49-37 по првиот дел од мечот.
Работите на теренот не се променија ниту во второто полувреме. Серијата на тројки на Караџовски и Стајиќ донесе предност од +20 (61-41) за „зелено-белите“, а и покрај тоа што Еуро Никел на крилја на Гавриловиќ и Златев успеа да ја намали негативата на 71-56 по 30. минути игра, нешто подоцна и на -13 (73-60) во 32. минута, навременото консолидирање на редовите на Пелистер не дозволи неизвесна завршница.
Со 26 поени и 8 скока Хаџифејзовиќ го предводеше Пелистер, а него го следеше Стајиќ со дабл-дабл од 17 поени и 10 асистенции. Со 15 поени најрасположен кај Еуро Никел беше Стојановски, а 12 поени и 10 скока забележа Планиниќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
