Шкупи со пресметката против португалската Санта Клара го продолжува европскиот пат ова лето во новата УЕФА Конференциска лига. Вечерва од 20 часот на националната арена „Тодор Проески“ во Скопје чаирчани го играат првиот натпревар од 2. квалификациско коло, водени од желбата да се елиминираат и Португалците и покрај тоа што очигледно ја носат фаворитската улога пред овој двомеч.
Шефот на стручниот штаб на Шкупи, Гоце Седлоски вели дека неговиот тим ќе мора да одигра трпеливо, паметно и концентрирано денеска доколку сака позитивен резултат пред реваншот во Португалија.
„Желбата е да одиграме еден добар натпревар и да ги израдуваме навивачите со победа. Нормално, пред себе имаме еден тежок противник кој игра брз и агресивен фудбал, но и ние имаме свои адути. Секако, утре ќе биде само првото полувреме, затоа што не очекува реванш дуел на кој верувам ќе биде одлучен патникот во следното коло. Затоа мора малку тука да бидеме трпеливи и смирени, затоа што не очекуваат и дополнителни 90 минути на гостински терен. Направивме анализи на Санта Клара. Имаат одлични индивидуалци во тимот, но резултатот ќе зависи и од нашата игра. Мора да бидеме подобри од претходните дуели на европската сцена, и момците се свесни за тоа. Знаат играчите дека ќе играме офанзивен фудбал, така ќе биде и утре, мора да се игра фајтерски иако се зависи и од тоа колку ќе ти дозволи противникот. Затоа мора трпеливо, паметно до позитивен резултат на првиот меч“ – вели Седлоски.
Капитенот, Фатих Исмаили, пак, потенцира максимална подготвеност на сите во тимот за да се дојде до посакуваниот позитивен резултат.
„Максимално сме подготвени за овој натпревар. Свесни сме дека само со максимално издание на терен во текот на сите 90 минути можеме да дојдеме до позитивен резултлтат. Знаеме дека ќе биде тежок натпревар, но верувам дека ќе покажеме за што се е подготвен Шкупи“ – вели Исмаили.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
