Покрај нашиот најмлад интернационален фудбалски судија, перспективниот Игор Стојчевски, на Европското првенство за млади категории, фудбалери до 17 години што се одржува во Израел до 2. јуни, на шампионатот е присутен по налог на УЕФА и комесарот за безбедност и интегритет на Фудбалската федерација на Македонија, Роберт Марковиќ.
Oдговорна задача за Марковиќ ако се знаат строгите безбедносни мерки што се применуваат не само на фудбалските натпревари туку и на останатите спортови во Израел, дури и тогаш кога израелските спортисти настапуваат во другите држави.
Игор Стојчевски, кој во Израел е и со помошниот судија Даниел Василевски, веќе беше главен судија на мечевите: Холандија-Бугарија (3-1) и Германија-Луксембург (3-0) што е знак дека добро се покажал бидејќи по одиграни три кола веќе беше главен судија на два натпревари.
На мечот Германија-Луксембург покрај Василевски му помагаа и Мирослав Максимов од Бугарија, четврти судија бил Томас Гатри од Велс. Инаку на шампионатот судат шест најперспективни млади судии од Европа и двајца домашни судии. На првенството настапуваат осум репрезентации поделени во две групи.
M.M.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
