Александар Серлот ја објасни ситуацијата која го одбележа болниот пораз на Норвешка од Англија во четвртфиналето на Светското првенство.
Напаѓачот на Атлетико Мадрид објасни зошто не го проиграл осамениот Ерлинг Халанд во моментот кога неговиот тим имаше одлична можност да поведе со 2-0.
Норвешка водеше со 1-0 против Англија кога, во 44. минута, Мартин Едегор направи брилијантен пас за да го испрати Серлот во 100% шанса. Серлот и Халанд беа во ситуација два на еден против Џон Стоунс, додека Деклан Рајс и Нико О’Рајли се обидуваа да се вратат во одбраната.
Повеќето очекуваа едноставно странично додавање до Халанд, кој ќе имаше практично отворен пат до голот.
Сепак, Серлот ја забави акцијата и реши да се обиде да го надигра Стоунс. И погреши….
Казната дојде само три минути подоцна, кога Џуд Белингам израмни.
Поранешниот напаѓач на Англија и стручен коментатор на Би-Би-Си, Алан Ширер, еден од најдобрите стрелци во историјата на Премиерлигата, не ги штедеше своите критики.
„Англија повторно имаше среќа. Серлот мораше да игра со Халанд многу порано. Тој одлучи да не го стори тоа и потоа можноста беше пропуштена“, рече Ширер.
По поразот на Норвешка со 2-1 во продолженијата, Серлот објасни како ја гледал целата ситуација.
„Ја примив топката, погледнав нагоре и видов дека Стоунс ја затвора линијата за додавање. Потоа направив уште еден допир, што беше грешка. Чекав тој да направи потег, наместо јас да го натерам да реагира“, рече напаѓачот на Атлетико Мадрид.
Тој додаде дека неговата прва намера била да му асистира на Халанд, но дека проценил дека во тој момент таа можност исчезнала.
„Единственото нешто што го сакав во таа ситуација беше да му ја додадам топката на Ерлинг. Но, ми се чинеше дека нема повеќе простор за тоа додавање, па затоа решив да шутирам.“
This angle of Sørloth ignoring Haaland. The reaction from Haaland says it all man. He was frustrated and disappointed, just like the rest of us. pic.twitter.com/i1sf0SjAH7
— Geronimo Morgans (@GeronimoMorgans) July 12, 2026
ЦЕЛ НА УЖАСНИ ВЕРБАЛНИ НАПАДИ
Еден ден по завршувањето на турнирот за Скандинавците, ѕвездата на Атлетико Мадрид стана цел на ужасни онлајн напади.
Бесните навивачи оставија над 85.000 претежно навредливи коментари на неговата последна објава на Инстаграм.
Серлот не коментираше за тоа, но неговата девојка Лена Селнес објави некои од тие пораки, вклучувајќи директни закани со кои го повикуваат Серлот да изврши самоубиство, како и пораки со кои им се вели на двајцата веднаш да ја напуштат Норвешка.
„Светското првенство и фудбалот носат многу радост, но и многу омраза. Не сакав да обрнам внимание на ова, но по вакви коментари чувствувам дека едноставно морам да реагирам. Се надевам дека сите ќе можат малку повеќе да размислат пред да остават вакви коментари, без оглед на ситуацијата и настаните на теренот“, напиша Селнес.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
