Тренерот на Пелистер, Наџи Шенсои по убедливиот пораз на битолчани во првиот натпревар од 1. квалификациско коло за ЛЕ против Лех во Познањ, веќе е свесен дека патникот за следната рунда натпревари во Лигата на Европа е добро познат.
Шенсои, веќе предавајќи се, истакна дека реваншот за седум дена во Струмица по денешните 4-0 за Лех Познањ ќе биде само формалност.
„Честитки за Лех кој стигна до заслужена победа. Мислам дека патникот за второто коло во Лигата на Европа е веќе решен, а реваншот ќе биде формалност. Ако го гледате само резултатот од 4-0 се добива впечаток дека Лех лесно победил, но тоа не е така. Ние одлично париравме во првите 30 минути, а потоа се се сруши само за неколку минути. Не заслуживме толку висок пораз, а мислам и дека судиите непотребно многу му помагаа на домаќинот. Сепак, Лех е многу поквалитетен противник, ние сакавме само успешно да го презентираме македонскиот фудбал и ова е се што можевме да направиме. Пелистер има буџет од само 750 илјади евра, а игравме со далеку помоќен противник“ – рече Шенсои на прес-конференцијата по мечот.
Тренерот на Лех Познањ, Ненад Бјелица, пак, сосема очекувано задоволен од убедливата победа.
„Среќен сум од постигнатиот резултат. По првиот гол се опуштивме и игравме далеку подобро. Не игравме најдобро што знаеме, но најважен е резултатот. Ова е многу добар резултат за нас иако има уште 90 минути игра“ – рече Бјелица.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
