УЕФА започна официјална постапка против Барселона во таканаречениот случај Негреиро. Овој потег дојде откако Реал Мадрид достави 50.000 страници документација до управното тело на Европа. Иако случајот е застарен според шпанските спортски прописи, УЕФА го смета за активен и има намера да спроведе истрага до крај.
Предмет на истрагата се исплати од Барселона во износ од 8,4 милиони евра на поранешниот потпретседател на Техничкиот комитет на судии во периодот од 2001 до 2018 година. УЕФА сака да утврди која била целта на тие исплати, што каталонскиот клуб сакал да постигне со нив и какво било вистинското влијание на наводните извештаи за кои платил.
УЕФА чека судска одлука три и пол години
Кога аферата стана јавна во април 2023 година, претседателот на УЕФА, Александар Чеферин, оцени дека тоа е една од најсериозните ситуации што ги видел во фудбалот.
„Не можам директно да коментирам за тоа од две причини. Прво, затоа што имаме независно дисциплинско тело кое се занимава со него. Второ, затоа што не го проучив случајот детално. Сепак, можам да кажам дека сум информиран и дека ситуацијата е исклучително сериозна. Тоа е едно од најсериозните нешта што сум ги видел во фудбалот. На ниво на шпанската лига, случајот, секако, е застарен и не може да има последици од натпреварувањето, но постапката е во тек пред шпанското граѓанско обвинителство. Што се однесува до УЕФА, ништо тука не е застарено“, рече Чеферин тогаш.
УЕФА ја чекаше судската одлука во последните три и пол години, но ситуацијата се промени по потегот на мадридскиот клуб. Назначениот инспектор сега детално ја разгледува доставената документација, а УЕФА процени дека случајот е доволно сериозен за да отвори службено досие.
Официјалното отворање на постапката значи дека ќе има детална анализа на доказите и собирање информации од вклучените страни, кои исто така ќе дадат свои изјави. Барселона исто така ќе добие шанса да се брани.
Можна забрана од натпреварувања и исклучување од Европа
Реал Мадрид побара да и се одземат на Барселона титулите што ги освои во годините кога клубот му плаќаше на судијата Хозе Марија Енрикез Негреира. УЕФА има право во секое време да забрани на кој било клуб да учествува во неговите натпреварувања ако процени дека се обидел да влијае на регуларноста на натпреварувањето, што е дефинирано во член 4 од нејзините правилници.
Во периодот на спорни исплати, Барселона освои дури 33 големи трофеи, меѓу кои девет титули во шпанското првенство и четири титули во Лигата на шампионите.
Ла Лига, 9 пати: 2004/05, 2005/06, 2008/09, 2009/10, 2010/11, 2012/13, 2014/15, 2015/16. и 2017/18
Копа дел Реј, 6 пати: 2008/09, 2011/12, 2014/15, 2015/16, 2016/17 и 2017/18
Шпански Суперкуп, 8 пати: 2005, 2006, 2009, 2010, 2011, 2013, 2016 и 2018.
Лига на шампиони, 4 пати: 2005/06, 2008/09, 2010/11 и 2014/15.
Суперкуп на УЕФА, 3 пати: 2009, 2011 и 2015 година.
Светско клупско првенство, 3 пати: 2009, 2011 и 2015 година.
Почетокот на постапката се совпаѓа со казната што Премиерлигата му ја изрече на Манчестер Сити за кршење на правилата помеѓу 2009 и 2018 година, што може да го доведе клубот до испаѓање. УЕФА претходно го казни Сити со двегодишна забрана за учество во европските натпреварувања, но Арбитражниот суд за спорт (ЦАС) на крајот пресуди во корист на англискиот клуб.
Соопштение за медиумите на УЕФА
„УЕФА потврдува дека од Реал Мадрид добила значителен број документи поврзани со истрагата против ФК Барселона во случајот со Хозе Марија Енрикез Негреира, поранешниот потпретседател на Техничкиот комитет на судии на Шпанската фудбалска асоцијација (т.н. „случај Негреира“). Етичките и дисциплинските инспектори на УЕФА, исто така, ги добија овие документи и ќе ги проценат како дел од тековниот преглед на случајот“, се вели во соопштението на УЕФА.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
