Руди Гарсија кој ја водеше Белгија на Светското првенство, вели дека напорите на тимот на турнирот во Канада, Мексико и САД биле попречени од работата на медицинскиот тим.
Договорот на Гарсија не беше продолжен по Светското првенство, а во своето прво интервју по настанот, тој го обвини медицинскиот персонал на репрезентацијата за пропусти кои, според него, довеле до неубедлив настап на турнирот, иако Белгија стигна до четвртфиналето.
„Го загрозивме нашиот настап на Светското првенство поради одредени повреди и болести кои не беа соодветно третирани“, почна Гарсија.
Белгија го започна турнирот неубедливо, со нерешени резултати против Египет и Ирак, пред победата од 5-1 над Нов Зеланд во Ванкувер да им помогне да го освојат првото место во групата врз основа на гол-разликата. Потоа славеа над Сенегал за пласман во осминафиналето, каде што го одиграа својот најдобар натпревар на турнирот против САД.
Се очекуваше крилниот играч на Манчестер Сити, Џереми Доку, да биде клучен играч на тимот, но тој се бореше со болест и на крајот заврши во болница за време на Светското првенство поради течност во белите дробови.
„Една недела претходно, по мое инсистирање, успеавме да закажеме термин за снимање. Лекарот не сметаше дека снимањето е неопходно бидејќи му препиша антибиотици на Џереми. Џереми се чувствуваше подобро и на крајот и самиот не сакаше да оди. Но, шест дена подоцна, тој ја помина ноќта во брза помош“, заврши Гарсија.
Гарсија исто така ги спомена повредите на капитенот Јури Тилеманс, Шарл Де Кетеларе и Зено Дебаст за време на турнирот. Немаше моментална реакција од Белгиската фудбалска федерација.
Сепак, и покрај неуспесите, Гарсија смета дека завршил добра работа на таа позиција, а во интервјуто постојано нагласуваше дека си заминал без горчина.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
