Словенија нема да биде дел од претстојниот ракометен мундијал откако оваа селекција во баражот беше елиминирана од Унгарија. Избраниците на Веселин Вујовиќ вечерва славеа на гостински терен со 22-26, но како пресуден се покажа првиот натпревар што Унгарците го добија среде Словенија со 24-29, трасирајќи си го патот кон мундијалот.
Унгарија го контролираше резултатот на денешниот реванш во првото полувреме, во вториот дел Словенците во неколку ситуации стигнуваа до „плус два“, а на три минути до крајот поведоа и со 21-24. Сепак, словенечките ракометари немаа доволно време за чудо, па победата со конечни 22-26 се покажа пирова за Вујовиќ и за неговите ракометари.
Овој неуспех најверојатно ќе значи и повлекување на Веселин Вујовиќ од кормилото на словенечкиот состав. Поранешниот македонски селектор се повлече од тимот на Копер, се погласно се говори за негова преселба на клупата на Висла, а по непласманот на СП речиси сигурно е дека ќе биде ставен крај и на неговата авантура како селектор на Словенија.
Словенија беше ривал на Македонија во групната фаза на последните две големи натпреварувања, на СП во Франција и на ЕП во Хрватска, но оваа силна репрезентација во јануари сепак нема да биде дел од елитниот светски ракометен собир.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА