Фудбалерите на Баерн и Борусија Дортмунд одиграа нерешено 2-2 во големото германско дерби, во 8. коло од Бундеслигата. Гостите успеаја да се вратат од негативата во последните минути од средбата.
Се чинеше дека домашните ќе го задржат водството, но Фабио Силва го замолкна Минхен во 89. минута и му донесе голем бод на Дортмунд.
Првото полувреме беше обележано со поништен гол на Џоб Белингам и неколку добри шанси на двете страни. Во 34. минута, Дортмунд ја затресе мрежата преку англискиот играч за врска, но голот беше поништен по проверка на ВАР поради офсајд.
Баерн ја казни пропуштената можност на противникот четири минути подоцна, кога Конрад Лајмер најдобро реагираше на одбиената топка и им донесе водство на домаќините.
Дортмунд потоа успеа да одговори. Во 60. минута, Чуквемека ја испрати топката во шеснаесетникот, а Серху Гираси го совлада голманот со прецизен удар во долниот лев агол и го израмни резултатот.
Баерн повторно поведе шест минути подоцна. Хари Кејн со глава ја упати топката пред голот, а Дајо Упамекано се најде на вистинското место и постигна гол за 2-1.
Англичанецот претходно имаше шанса да постигне гол од пенал, но ја погоди пречката во 56. минута. Кејн повторно се приближи во 75. минута, но неговиот удар ја погоди стативата.
Кога се чинеше дека Баерн сепак ќе ја задржи предноста, Фабио Силва се вклучи во игра. Во 89. минута, Португалецот ја искористи топката што стигна до него во шеснаесетникот и ги постави конечните 2-2 со прецизен удар во долниот лев агол.
Баерн имаше уште една огромна шанса во судиското продолжение, но ударот на Ленарт Карл ја погоди пречката.
Така Дортмунд успеа да избегне пораз во Минхен, додека домаќинот може да жали за пропуштените шанси и изгубеното водство.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
