Стојанов: Не смее да има опуштање, Брегалница ја чекаат уште многу предизвици сезонава

Херојот во победата на Брегалница на гостувањето во Битола, Мартин Стојанов вели дека тимот воопшто не се опушта по убедливиот триумф над Пелистер, затоа што шампионатот е долг а „сините“ на секој следен натпревар сакаат да бидат што подобри.

Стојанов постигна два погодоци под „Тумбе кафе“ во триумфот од 0-3, сето тоа како дополнителен мотив плус за следните предизвици.

„Секако дека сме задоволни од одличната игра и трите бода во Битола. Но, тоа не смее да донесе никакво опуштање затоа што Брегалница мора да игра се подобро на секој следен натпревар. Не чекаат уште многу предизвици оваа сезона“ – вели Стојанов.

Веќе во петок, 29. октомври, „сините“ ги очекува гостувањето против Шкупи во Скопје.

„Јасно е дека не чека најтешкиот натпревар против најдобрата екипа во лигата. Но, наше е повторно да одиграме максимално ангажирано. Со еден таков однос сигурно и резултатот нема да изостане. Имаме повеќе од доволен мотив против лидерот на табелата за вистинско надигрување“ – истакнува Мартин Стојанов.

Се вчитува...