Екипата на Струга ТЛ продолжува да го следи чекорот со Шкендија во битката за врвот на Првата македонска фудбалска лига. Стружани денеска славеа со минимални 1-0 против Силекс.
Домашните до победата стигнаа со еден погодок, постигнат во второто полувреме. Ласана Диако беше најснаодлив во противничкиот шеснаесетник и во 59-та минута ја затресе мрежата за 1-0, резултат кој на крајот се покажа како конечен.
Силекс по примениот гол се обиде да се врати во натпреварот и во финишот создаде неколку опасни ситуации. Најблиску до израмнување беа во 84-та минута, кога Ѓерасов упати удар кој заврши во пречката.
Кратовци не се откажаа ниту во судиското продолжение, но не успеаја да го пронајдат патот до голот. Струга успешно го издржа притисокот и го приведе натпреварот до крај.
Со новата победа, Струга сега има 13 бодови и сега е само на два бода зад лидерот Шкендија. Тетовци претходно доживеаја неочекуван пораз од Тиквеш, па трката за првото место станува сè поинтересна.
Силекс, пак, останува на седум бодови и ќе мора да бара излез од резултатската криза во следните натпревари.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
