Шкендија цврсто го држи врвот со нов триумф над Работнички (2-1), Вардар очекувано го совлада Скопје со 3-0, а Академија Пандев доживеа пораз (0-1) дома од Победа. Пелистер победи по подолго време, а Силекс го освои Чаир.
Работнички прв поведе во Тетово, со голот на Чарлс Гофри во 35.минута. Остоја Стјепановиќ одлично го проигра, Нигериецот излезе сам пред голманот и рутински ја погоди мрежата на Захов.
Шкендија тргна поофанзивно и израмни пет минути подоцна. Хасани од слободен удар ја погоди гредата, одбиената топка Емини ја испрати во дирекот, а третиот обид на Марјан Радески заврши на вистинското место.
Во вториот дел, Шкендија имаше шанси преку Радески, Ибраими и Хасани, но Даниел Божиновски беше одличен. Сепак, водството стигна од пенал во 82.минута. Нехар Садики го собори Ибраими, заработи втор жолт картон, а Ферхан Хасани го реализираше пеналот за нов триумф на лидерот.
Вардар стигна до очекувана победа против Скопје. „Црвено-црните“ се мачеа на стартот, не беа прецизни, а „бункерот“ го разби Фелипе во 44.минута со одличен удар од 20 метри. Во вториот дел, Максим Максимов зголеми на 2-0 во 66.минута, а Џамбул Џигаури го постигна третиот гол во завршницата од натпреварот.
Пелистер ја прекина непријатната серија и ја совлада Ренова со 2-1 под „Тумбе кафе“. Лукас Кардосо во 35.минута донесе предност за битолскиот прволигаш, а Иве Трифуновски од пенал во 48.минута го удвои водството. Ренова постигна почесен погодок преку Валмир Нафиу, исто така од пенал во 80.минута.
Победа ја освои Струмица. Академија Пандев доживеа пораз на „Младост“ со 0-1, а единствениот погодок на мечот беше дело на Мирослав Станиќ во 45.минута од натпреварот.
Три бода на гости освои и Силекс, со триумф од 0-1 на Чаир против Шкупи. Во 13.минута, Бесарт Кривањева си постигна автогол, и тоа беше пресуден момент на овој натпревар.
ПРВА ЛИГА, 14.КОЛО – РЕЗУЛТАТИ
ВАРДАР – СКОПЈЕ 3-0
ШКЕНДИЈА – РАБОТНИЧКИ 2-1
ПЕЛИСТЕР – РЕНОВА 2-1
ШКУПИ – СИЛЕКС 0-1
АКАДЕМИЈА ПАНДЕВ – ПОБЕДА 0-1
Табела: Шкендија 34, Вардар 23 (-2), Силекс 22, Академија Пандев 21 (-1), Ренова 17, Работнички 16, Пелистер 15, Победа 15, Шкупи 15, Скопје 9.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА