Ракометарите на Вардар забележаа нова победа на меморијалниот турнир „Крсте Андоновски“ во Охрид, откако го совладаа Нексе со 33-27 и направија голем чекор кон пласманот во финалето.
За „црвено-црните“ ова беше значително потежок натпревар во однос на убедливиот триумф над Олимпијакос. Нексе одлично го отвори дуелот и во поголемиот дел од првото полувреме имаше предност.
Вардар, сепак, предводен од одличниот Валах, успеа да се врати во игра и да фати приклучок, но хрватскиот состав на пауза замина со минимална предност од 16-15.
Во вториот дел долго време се играше во егал, но Вардар го подигна нивото токму кога беше најпотребно. Македонскиот шампион влезе во серија, направи разлика и во завршницата рутински ја одбрани предноста за конечни 33-27.
Со оваа победа Вардар утре го очекува директен дуел со Тримо Требње за првото место во групата Б и пласман во финалето.
Во другата група, за место во големото финале ќе се борат Охрид и Загреб, додека Нексе по поразите од Тримо и Вардар ќе игра против Олимпијакос за третото место во групата и пласман во натпреварот за петтото место.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
