Одлуката за новиот натпреварувачки календар во италијанскиот фудбал предизвика бурни реакции меѓу клубовите кои се дел од полуфиналните дуели од Купот на Италија. Имено, предвидено е реваншите од полуфиналето меѓу Наполи и Интер, односно Јувентус и Милан, да се играат на 13 и на 14 јуни, а веднаш потоа – веќе на 17 јуни да се одигра и големото финале во ова натпреварување.
Веќе на 20 јуни продолжуваат и натпреварите од Серија А, а клубовите се бесни поради фактот дека играчите не се во посакуваниот тренажен процес, а три меча во периодот од 13 до 20 јуни сериозно го зголемуваат ризикот од повреди. Најразочарано делуваат од таборот на Интер, од каде најавуват дури и сценарио – „нероаѕурите“ со јуниорскиот состав да истрчаат на реваншот во Неапол. Во ситуација кога имаат негатива од првиот меч во Милано, Конте и клупските директори се во сериозна дилема да се откажат од купот за да не ризикуваат со повреди, па потоа да се фокусираат на Калчо-лигата.
Иако по променливите игри на почетокот од 2020 година Интер падна на третото место, со девет бода помалку и меч помалку од Јувентус, кај Конте и неговите избраници владее оптимизам дека оваа негатива може да биде надополнета.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
