На кошаркарските терени ширум Македонија изминатиот викенд започаа и возбудувањата од Втората лига која беше комплетирана со мечот помеѓу Шкупи и Охирд кој беше одигран вчера. Уште од самиот почеток тимовите најавија одлична и неизвесна сезона во која детали ќе одлучуваат за тоа кој од следната сезона ќе биде дел од „елитата“.
Веќе во првото коло два тима успеаја и да ја надминат границата од сто постигнати поени. Струмица славеше на домашен терен со 103-68 над минатогодишниот прволигаш Црн Дрим, а Чаир 2030 ја доби Хераклеа со 107-82.
Вардар беше блиску до надминување на оваа граница откако во дуелот со Тетекс ТТК славеше со 94-65, а двоцифрени победи забележаа и Соколи 1933 кои славеа над Баскет КАМ со 87-74, како и Шкупи кој го доби дуелот со Охрид со 80-70.
Најнеизвесниот натпревар беше одигран во Велес каде до гостинска победа од 78-80 стигна минатогодишниот полуфиналист Водно Санс. Домаќините имаа и предност од 17 поени во првото полувреме, но гостите од Скопје успеаја истата да анулираат, а потоа со поени во самата завршница да стигнат и до победа.
Дебитантите Златев со 14 поени, Петков и Богатиновски со по 11 беа лидерите на велешкиот тим, а како двоцифрен со 10 поени натпреварот го заврши Виларов.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА