Фудбалерите на Челси остварија убедлива победа од 5:1 над Борнмут во шестото коло од Премиер лигата и се вратија на победничките патеки по репрезентативната пауза.
„Сините“ испишаа клупска историја доаѓајќи до најбрзото водство од 2:0 бидејќи во првите два напади, во втората и третата минута преку Џордан Хендерсон и Морган Роџерс постигнаа два гола.
Менаџерот Чаби Алонсо не го крие задоволството од играта на неговите фудбалери.
„Денеска одигравме комплетен натпревар. Го контролиравме поголемиот дел од играта и сум многу среќен поради тоа. Ја задржавме стабилноста во одбраната освен во неколкуте минути по примениот гол, но во секој случај многу сум задоволен од играта што ја прикажавме“, изјави Алонсо.
Шпанецот е воодушевен и од еден од најискусните играчи, 36-годишниот Џордан Хендерсон, кој постигна два гола.
„Го доведовме поради сето она што го носи во играта, а ако е способен да постигне и два вакви убави голови, навистина сме пресреќни за него. Но, покрај головите, тој заврши одлична работа во средината на теренот. Неговата комуникација и опциите што им ги нуди на соиграчите посебно кога игра во тандем со Моисес Каиседо се од огромно значење за нашиот тим“, додава Алонсо.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
