Марио Балотели конечно ја заврши потрагата по нов клуб откако се договори кариерата да ја продолжи во италијанскиот второлигаш Монца. „Супер Марио“ е без клуб откако го раскина договорот со Бреша, беше поврзуван со бројни клубови, а минатата седмица беше објавено дека е најблиску до преселба во редовите на Васко да Гама.
Претседателот на бразилскиот клуб изјави и дека „трансферот на Балотели за нив би бил како да доаѓа Марадона“, но „Супер Марио“ не падна на овие комплименти и реши да остане во татковината.
Монца, чиј газда е поранешниот италијански премиер Силвио Берлускони, покажува амбициозен проект, моментно се наоѓа на осмото место на табелата, но јасно е дека со доаѓањето на Балотели овој тим ќе се обиде експресно да се вмеша во трката за влез во елитата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА