Енис Барди не го криеше задоволството од трите бода против Малта на стартот од новиот квалификациски циклус, нагласувајќи дека заслужената победа можела да биде и уште поубедлива ако се искористеа сите шанси во второто полувреме.
Барди во финишот на мечот имаше и еден извонреден шут од слободен удар, но гредата спречи негов погодок и за триумф од 3-1.
„Дојдовме до заслужена победа, и покрај тоа што знаевме дека ќе биде тежок натпревар затоа што нема едноставно лесен меч во модерниот фудбал. Но, мислам дека во второто полувреме бевме навистина доминантни, имавме поконкретни завршници и сигурно можевме и до поубедлива победа затоа што имавме навистина одлични шанси. Но, среќни сме со оваа победа затоа што ни беше многу важна на стартот од еден нов квалификациски циклус“ – изјави по мечот Барди.
Триумф кој секако многу значи пред следните јунски предизвици против селекции како Англија и Украина.
„Јас и претходно кажав дека мора да одиме чекор по чекор. Ете, првиот чекор го поминавме и сега е секој следен предизвик, затоа што овој циклус ќе биде нешто ново за нас во исклучително тешка група. Но, сите доаѓаме ментално силни во репрезентацијата и желни за нови докажувања. На секој ден меч ќе дадеме се од себе за позитивни резултати. Да бидам искрен многу потешко е да се игра против Малта која постојано се брани, отколку со фаворити против сигурно ќе имаме дополнителен мотив. Но, на домашен терен со нашите навивачи и со оваа поддршка од трибините верувам дека можеме уште до многу позитивни резултати“ – истакна Барди.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
