Европскиот првак Реал Мадрид ги загуби шансите за освојување на првото место во регуларниот дел од Евролигата, откако „кралевите“ вечерва загубија на гостувањето против Басконија со резултат 86-76. Мечот беше многу значаен за домаќините, кои се во трка за осмото место кое води во четврт-финалето, па кошаркарите на Басконија влегоа многу помотивирани во натпреварот и заслужено се радуваа на победата. Домаќините клучната предност ја создадоа во третата четвртина, Реал дојде до „минус четири“ во последниот период, но Басконија го издржа последниот налет и стигна до значајни бодови.
„Кралевите“ по овој пораз на две кола до крајот од лигашкиот дел се наоѓаат на третото место на табелата, со две победи помалку од Фенербахче и една помалку во однос на второпласираната ЦСКА Москва.
Пуарие со 19 поени и 16 скокови беше најзаслужен за победата на Басконија, 18 постигна Видоза, додека кај Реал тотално потфрли Серхио Љуљ, реализирајќи пет поени со шут за тројка (0/8).
Жалгирис лесно и убедливо славеше над Дарушафака со 94-67, додека Макаби триумфираше на гостувањето во Русија против Химки со 71-76.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
