Десното крило на македонската младинска репрезентација, Томислам Јагуриновски не ќе може да настапи на последните два натпревари од групната фаза на СП (У21) во Алжир, против Шпанија и против Бразил кои се решавачки за пласман на Македонија во осминалето на мундијалот.
Јагуриновски доби два меча суспензија од ИХФ поради прекршокот што го направи на дуелот со Тунис и по кој заработе директен црвен, а потоа и син картон. Македонскиот репрезентативец во финишот на натпреварот, со лакотот удри еден од противничките играчи и судиите тоа го санкционираа со директен црвен и потоа и со син картон кој значи дополнително оценување на тежината на прекршокот и потенцијална санкција за играчот.
Како алтернатива за Јагуриновски на десната крилна позиција, селекторот Илија Темелковски го има Мице Шилегов, а по потреба може да помогне и десниот бек Мартин Велковски.
Македонската репрезенатција по првите три натпревари на СП има две победи против Русија и против Буркина Фасо и пораз од Тунис во вчераното трето коло. Следниот натпревар младинците го играат утре против главниот фаворит во групата Ц, репрезентацијата на Шпанија, а во последниот меч од групната фаза противник им е селекцијата на Бразил.
Првите четири репрезентации од групата продолжуваат во осминафиналето.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
