Шалке игра сезона за заборав, по 23 одиграни натпревари клубот од Гелзекирхен има само една победа, со само девет освоени бода, девет помалку од 15. место на табелата. На „сино-белите“ не им помагаат ниту финансиските проблеми предизвикани од пандемијата на коронавирус, а невозможната мисија за опстанок во Бундеслигата сега ќе ја добие Димитрос Грамозис.
42-годишниот Грк е анонимус во фудбалскиот свет, а најголемото достигнување му беше петто место во Втората германска лига. Претходно неговиот ангажман беше во Бохум, а има работено и како помошен и главен тренер во разни селекции и младински категории.
Грамозис ќе ја наследи клупата на Шалке од Кристијан Грос, а пред него на „жешкото столче“ седеа и Давид Вагнер и Мануел Баум. „Четвртата среќа“ на тимот потпиша договор до крајот на сезоната, но германските медиуми веруваат дека со оглед на финансиските проблеми, ќе го предводи клубот и во следната сезона во втората германска лига.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
