Македонските навивачи ќе имаат можност да им дадат поддршка на фудбалерите на селекторот Благоја Милевски откако Владата со најновата одлука овозможи присуство на гледачи во висина од 50% од капацитетот на националната арена „Тодор Проески“.
Фудбалерите имаат можност со триумф над Ерменија да се искачат на првото место во квалификациската група, а ФФМ објави дека влезниците за овој дуел закажан за 2 септември ќе изнесуваат 300 денари. Истата цена ќе се однесува и на билетите за натпреварот против Романија закажан за 8 септември, а согласно одлуката на Владата, влез на стадионот ќе биде овозможен со покажан сертификат за вакцинација, или сертификат/потврда за прележан Ковид-19 во последните 45 дена, сметајќи од денот на оздравувањето.
Воедно, Управниот Одбор на ФФМ донесе одлука билетите за квалификацискиот дуел на младинската репрезентација против Србија, што ќе се игра на стадионот „Билјанини Извори“ во Охрид на 7 септември да бидат по цена од 150 денари.
Љубителите на женската фудбалска А репрезентација на Македонија ќе може да ја бодрат нашата селекција на квалификацискиот натпревар против Австрија на 21. септември на Националната арена „Тодор Проески“ со купен билет по цена од 100 денари.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
