Хјустон рокетс се наоѓа во криза, што кулминираше откако двајца кошаркари на овој тим влегоа во конфликт со помошниот тренер Џон Лукас.
Искусниот 68-годишен стручњак пред остатокот од тимот ги прозвал Кристијан Вуд и Кевин Портер џуниор, занедоволно залагање во првото полувреме на дуелот со Денвер. Стручниот штаб бил особено бесен поради незалагањето во одбраната и примените 47 поени во втората четвртина, по што во соблекувалната на полувремето дошло до сериозен конфликт.
Кевин Портер џуниор ги загубил нервите откако тренерот му кажалдека е далеку од посакуваното ниво, па дури и го гаѓал Лукас со тврд предмет, а потоа тргнал и во физичка пресметка со 47 години повозрасниот стратег, пред да биде запрен од соиграчите.
Критиките кон Вуд се однесувале на неговата неодговорност, откако овој кошаркар задоцнил на загревањето, пропуштајќи го и тестирањето на Covid-19. Тренерите решиле да го санкционираат со тоа што нема да биде стартер, тој подоцна одигра осум минути до крајот на полувремето, а по конфликтот на паузата одбил да влезе во игра во второто полувреме.
Сигурно ќе следат санкции за недисциплинираните кошаркари, но едно е јасно – оваа сезона е дебакл за Хјустон рокетс, тим кој со 10 победи и 27 порази е закован на последното место во Западната конференција.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА