Куманово стави крај на серијата од четири порази едно по друго во Првата кошаркарска лига откако во 12. коло славеше на гостувањето кај Чаир 2030 со 86-91. Кумановци успеаја двоцифрената негатива од третата четвртина да ја претворат во победа со подобра игра во одбраната.
Отварањето на натпреварот беше во знакот на Куманово кој отвори со серија од 2-13, но тогаш на сцена на чаирчарни настапија Френклин и Мохамед кои се погрижија домаќинот не само да ја стигне негативата, туку и да поведе со 28-18 по 10. минути игра. Високиот ритам на двата тима продолжи до полувремето, Чаир умешно ја одржуваше предноста која во еден момент изнесуваше 40-30, но финишот на првите 20. минути им припаднаа на кумановци кои намалија на 48-42.
Чаир 2030 преку Френклин, Реџа и Мохамед успеа да стигне до највисоките 56-42 уште во воведот на второто полувреме, но како што одминуваа минутите гостите успеаја да го наметнат својот ритам. Зивчевиќ и Јанески погодуваа за „сино-белите“, нив им се приклучи и Нацевски веќе до крајот на третата четвртина гостите ја вратија негативата од еден напад (66-64). Добриот ритам на избраниците на Ѓорѓиевски продолжи и во последните десет минти во кои преку новите засилувања гостите стигнаа и до предност од 75-82, а и покрај тоа што имаа можност и за зголемување на позитивата не успеаја во своите обиди па следеше казна од домаќинот. Чаирчани влегоа во серија со која ја вратија едноцифрената негатива (81-82), а неизвесниот меч траеше до последните секунди. При резултат 86-87 на 20 секунди пред крајот, Мохамед имаше шанса да донесе водство, но откако го промаши обидот мирната рака на Џојнер и Јанески донесе победа.
Со дабл-дабл од 26 поени и 10 скока лидер на Чаир 2030 беше Мохамед, додека него го следеше Френклин со 17 поени и 8 скока. 29 поени и 13 скока за Куманово постигна Јанески, додека со 22 поени него го следеше Зивчевиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
