Работнички забележа две победи и две ремија во пролетниот дел од првенството. На почетокот на третиот круг, како и на почетокот на пролетта, противник е Академија Пандев. На снежните услови во Струмица тогаш славеше Работнички со 0-1, со голот на Кристијан Стојкоски, а утре тимот на Александар Влахо има нов голем предизвик.
Фудбалерот од средниот ред Стефан Јевтоски вели дека тој и соиграчите се полни со самодоверба и доколку Работнички повтори дел од минатите изданија очекува триумф.
„Работнички има сосема нов лик оваа пролет. Играме квалитетно, офанзивно, сакаме да постигнеме гол повеќе од противникот. Во исто време, сакаме да наметнеме доминација на средината на теренот, а кога се браниме, тоа да биде цврсто и бескомпромисно. И на досегашните натпревари тоа функционираше многу добро. Верувам дека и утре ќе се претставиме во такво издание и ќе победиме ако ги исполниме поставените задачи од шефот Александар Влахо. Полни сме самодоверба и мислам дека од нашето издание зависи дали ќе го победиме тимот на Академија Пандев. Секако, за нив максимален респект, тоа е одличен тим со неколку квалитетни индивидуалци“ – вели Стефан Јевтоски.
Натпреварот меѓу Работнички и Академија Пандев е закажан за утре, со почеток во 15 часот, на Националната арена „Тодор Проески“. Главен судија на натпреварот ќе биде Јован Качевски од Струга.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
