Дарко Каески е новиот Директор во Агенцијата за Млади и Спорт, кој ќе го има пред себе предизвикот да помогне за поголема инволвираност на младите лица во нашето општество, но и да ја продлабочи соработката со спортските федерации. Како 27-годишник, тој е добро упатен во потребите на младите, кои во последниот период беа целосно запоставени.
„Агенцијата за млади и спорт досега главната перцепција ја имаше врз спортот, но новото раководство со мене како директор ќе се залага за младите да добијат значително место во општеството. Ќе разговараме и ќе ги воочиме проблемите што ја тиштат младината во Р. Македонија, како невработеноста и масовното иселување на младите луѓе, потоа ќе работиме на решавање на овие ситуации“ – истакнува новиот директор.
Тој потенцира дека поголемиот ангажман кон делот за младите лица во Р. Македонија никако нема да значи запоставување на спортските активности и комуникацијата со спортските федерации.
„Ние во ниту еден план нема да го оставиме спортот во позадина. Напротив, ќе ја продлабочиме соработката со федерациите и ќе му дадеме уште позначајно место на спортот во животот во нашата држава“ – вели Каевски.
АМС повторно ќе има одговорна улога околу распределбата на финансиските средства на спортските федерации, за која Каевски е дециден дека АМС ќе инсистира на наменско трошење на финансиите што ќе бидат доделени од ова државно тело.
„Прекратко време сум овде за да можам да говорам за конкретна стратегија, најпрвин ќе направиме ревизија за работата и досегашното доделување на средствата. Она што можам да кажам е дека нема да се мешаме воопшто во спортскиот дел, а единствена работа што ќе ја бараме е транспарентност во однос на трошењето кои ќе ги добиваат од АМС. Најпрвин ќе направиме детална ревизија на потрошените пари на сите федерации досега, по што ќе се направи и стратегијата за во иднина. Сакаме федерациите на нашата агенција да гледаат како на партнер за развој на македонскиот спорт“ – потенцира Дарко Каевски.
Новиот директор на Агенцијата за Млади и Спорт не ја исклучува можноста во блиска иднина дел од оваа институција да стане и некое звучно спортско име.
„Немаме конкретен план бидејќи штотуку го почнавме овој сериозен ангажман, но сигурно е дека ќе се вклучат луѓе кои имаат влијание во спортот. Целта е јасна – спортот да го издигнеме на едно повисоко ниво. Спортот треба да биде оставен на спортистите, не на политиката“ – порачува за крај Директорот на АМС, Дарко Каевски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
