Ерменија, по мировниот договор со Азербејџан со руско посредство, неодамна ја заврши војната во Нагорно-Карабах. Но, Ерменците по загубените територии се чувствуваат поразени од таа битка поради што секоја спортска битка, пак, сега за нив значи живнување на нацијата.
Свесен за тоа е и селекторот на ерменската репрезентација, Жоакин Капарош, кој вели дека мора со победа против Македонија утре во Никозија, Кипар, да дојдат до пласман во Б-лигата следната сезона во Лигата на нации и да му подарат малку радост на ерменскиот народ.
„Вистинска штета е што натпреварот не се игра во Ерменија. Ќе беше добро да играме на нашиот стадион, но но за жал таква е ситуацијата. Но ќе направиме се да дојдеме до посакуваната победа, затоа што цела земја го чека овој меч и да им подариме радост. Ова е нешто многу важно за нас. Да се надеваме дека и спортската среќа ќе биде на наша страна и ќе дојдеме до целта“ – истакна на прес-конференцијата Капарош и дополни:
„Имаме тим кој може добро да одговори тактичи за утрешниот натпревар, и покрај тоа што ни недостасуваат неколку фудбалери. Мора да го ставиме противникот под притисок. Одигравме добар меч против Грузија, тактички мудро и сега тоа треба да го повториме. Знам дека на крајот од годината и во овој месец фудбалерите се малку уморни, но утрешниот натпревар е многу важен за нас и мора да го дадеме максимумот“.
Ерменците во победата против Грузија беа предводени од Горг Газарјан кој сега се жали на повреда.
„Газарјан одигра одличен натпревар против Грузија, тој е наш лидер и ќе направиме се за да биде подготвен за утрешниот дуел“ – вели ерменскиот селектор.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА