Сами Кедира ќе го продолжи својот престој во Јувентус откако германскиот репрезентативец денеска потпиша нов договор со „старата дама“, со важност до 2021 година. Ваквиот исход е изненадувачки ако се знае дека Кедира во изминатиот период беше поврзуван со неколку тимови од Германија, но и со клубови од САД, за тој во последен момент да се премисли и да реши да остане во црно-белиот дрес на најтрофејниот италијански клуб.
„За да се искаже важноста на Сами Кедира за Јувентус доволен е само еден податок – откако пристигна во клубот пред три години, тој е играч за врска со најмногу одиграни минути за нашиот клуб, вкупно 8882 во сите натпреварувања. Пресреќни сме што се договоривме, Јувентус и Кедира продолжуваат заедно, со потпишување на договор до 2021 година“ – се пофали италијанскиот првак на својата официјална веб-страница.
Сами Кедира пристигна во Јувентус како слободен играч по истекот на договорот со Реал Мадрид и веднаш се наметна како стандарден првотимец кај тренерот Масимилијано Алегри. Во трите години во кои е член на овој клуб Германецот стигна до три двојни круни во Италија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
