Антонио Конте го предводи Интер до ново скудето, прво по пауза од десет години. „Нероаѕурите“ синоќа славеа над Сасуоло со 2-1, со што сега имаат дури десет бода предност во однос на второпласираниот Милан. Со оглед на моментната форма, единствената дилема не е дали, туку кога Интер ќе ја прослави шампионската титула, а Конте веќе е насочен кон други цели за својот тим – да се обиде да ја стигне серијата на Роберто Манчини за најмногу победи во низа во историјата на италијанскиот фудбал.
Станува збор за сезоната 2006/2007, кога Интер под водство на Манчини славеше на 17 натпревари во серија, апсолутен рекорд во Калчо-лигата. „Нероаѕурите“ ја завршија таа сезона убедливо први, со 97 освоени бода и само еден претрпен пораз.
На второ место на оваа ранг-листа се наоѓа Масимилијано Алегри, кој со Јувентус во сезоната 2015/16 забележа 15 победи во низа, а третопласиран е Маурицио Сари, со 13-те победи, на крајот од сезоната 2016/17 и почетокот на шампионатот 2017/18.
Интересно, десетте победи во серија не се најдобар скор во тренерската кариера на Конте, кој како стратег на Јуве имаше дванаесет триумфи во низа во сезоната 2013/14.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
