МЗТ Скопје очекувано лесно и убедливо славеше на домашен терен против Куманово (86-72), во заостанатиот натпревар од домашниот шампионат. Во ситуација кога „металците“ в недела ги очекува домашен меч со Мега што е од огромно значење за АБА-лигата, тренерот Петровиќ имаше можност да го изротира тимот, лимитирајќи ја минутажата и чувајќи ја силата на клучните кошаркари пред неделниот дуел со Мега.
Куманово парираше само во првата четвртина, што гостите ја отворија со предност од 2-6, завршувајќи ги стартните десет минути со израмнети 17-17. МЗТ Скопје за првпат влезе во серија во втората четвртина, одлепувајќи се на „плус осум“ пред Куманово да намали на 36-30 со поените на Ален, резултат со кој се замина на одмор. Како решавачка се покажа третата четвртина, во која актуелниот шампион целосно доминираше, добивајќи ја со 29-15 и трасирајќи си го патот до победата. Последните десет минути беа само рутина за избраниците на Петровиќ, кои знаеја како да ја задржат удобната предност, претворајќи ја во убедлива победа изразена со конечни „плус четиринаесет“.
Сите дванаесет кошаркари на МЗТ се запишаа меѓу стрелците на овој натпревар, а најефикасни беа Дамјан со 12 и Војдан Стојановски, Пандев и Миќовиќ со по 10 поени. Американецот Ален со 20 поени беше прв стрелец на Куманово при вечерашниот пораз во СЦ „Јане Сандански“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
