Шпанскиот тенисер Рафаел Надал тргна фуриозно на Ролан Гарос сезонава, па веќе во низа има две победи во Париз, Франција. Рафа во три сета го совлада Корентан Муте, и досега му оди се’ според планот на еден од своите најомилени турнири.
Надал истакна дека е задоволен од приемот кај публиката, затоа што играше против домашен тенисер.
„Мислам дека публиката беше многу фина со мене, нели? Воопшто не чувствував дека публиката е против мене. Мислам дека беа 50-50 и поддржуваа добар тенис. Но, секогаш имам добра поддршка овде во Париз. Мислам дека луѓето знаат колку ова место е посебно за мене. Овде чувствувам голема љубов“, изјави Надал.
Шпанецот повторно славеше во три сета, а само во третиот почувствува малку поголем отпор од противникот.
„На почетокот на третиот сет направив грешка, но се вратив. Имав неколку несигурни моменти, но среќен сум поради добриот финиш и што го завршив мечот во три сета. Задоволен сум како се одвиваат работите“, додаде Рафа.
Надал во следното коло ќе се сретне со холандскиот тенисер Ван де Зандшулп.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
