Норвешка обезбеди историски пласман во четвртфиналето на Светското првенство по големата победа од 2:1 над Бразил, но во пресрет на натпреварот против Англија, од таборот на репрезентацијата доаѓаат многу загрижувачки вести.
Селекторот Стале Солбакен призна дека неколку репрезентативци не се чувствувале добро во последните денови и дека во тимот се појавиле симптоми на вирус, поради што постои голема неизвесност пред еден од најважните натпревари во поновата историја на норвешкиот фудбал.
Јорген Странд Ларсен и Маркус Холмгрен Педерсен се најпогодени, додека неколку членови на националниот тим исто така развиле кашлица и засипнатост. Норвешките медиуми известуваат дека постојат сериозни загрижености дека вирусот се проширил во тимот, иако Солбакен верува дека причината би можела да биде исцрпувачкото патување, климатизацијата и напорното темпо на натпреварувањето.
„Не славев, бидејќи бев премногу уморен, па заспав и го гледав натпреварот подоцна. Одговорив на неколку пораки по патот. Речиси воопшто не спиев…“, рече Солбакен, осврнувајќи се на здравјето на Педерсен, кој веќе го пропушти натпреварот против Бразил поради здравствени проблеми:
„Немаше треска и тренираше, но чувствуваше дека неговото тело не го слуша како што треба. Докторот разговараше со него наутро и тогаш беше добро. Но, подоцна болеста очигледно се прошири и се чувствуваше сè полошо и полошо.“
Иако признава дека здравствената состојба не е идеална, Солбакен сè уште не сака да зборува за вирусот:
„Го имавме само Јорген кој имаше треска, а потоа неколку луѓе добија кашлица и засипнатост. Но, има клима уреди, летови, соблекувални… Има повеќе од 50 луѓе, па би било чудно никој да не се разболи.“
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
