Преодниот рок во Премиерлигата ова лето го одбележаа неколку спектакуларни трансфери како преминувањето на Ерлинг Халанд во Манчестер Сити, Садио Мане во Баерн Минхен, Кулиду Кулибали во Челси…, но има и такви кои поминаа „под радарот“, а можат да бидат клучни во новата сезона.
Аналитичарите издвоија пет млади фудбалери кои доколку добро се поклопат во новата средина имаат потенцијал за големи нешта.
Џанлука Скамака – од Сасуоло во Вест Хем
Лондонскиот тим веќе некое време се мачи да го најде вистинското решение во нападот, а ова лето изборот падна на 23-годишниот Италијанец. Скамака во Вест Хем пристигна по одлична сезона во дресот на Сасуоло каде постигна 16 голови и се очекува да биде главно „оружје“ на Дејвид Мојс во битката за висок пласман во Премиерлигата, но и битката за титула во Конференциската лига.
Фабио Виеира – од Порто во Арсенал
Микел Артета успеа да го препороди Арсенал по превземањето во 2019 година, а шпанскиот стартег ова лето стигна до посакувани трансфери со кои ќе цели кон враќање во Лигата на Шампионите. Еден од нив беше и Фабио Виеира, 22-годишникот кој претходната сезона во дресот на Порто постигна пет гола и забележа 15 асистенции. Може да игра на повеќе позиции, во средниот ред, на крило и како лажна деветка.
Свен Ботман – од Лил во Њукасл
Трансферот на Свен Ботман во Њукасл не предизвика „потрес“ во Европа, но 22-годишникот има огромен потенцијал кој може му го даде статусот на клучен играч во тимот со најбогат газда на светот. Англичаните не се „расфрлаа“ со пари ова лето, а притоа составија тим кој може да биде големо изненадување.
Таиво Авонији – од Унион Берлин во Нотингем Форест
Нотингем Форест по подолго време се врати во „елитата“ на англискиот фубал, а намерува таму да остане и во иднина. За таа цел „црвено-белите“ веќе го ангажираа Џеси Лингард кој заедно со Таиво Авонији се очекува да донесе опстанок. Од Англичанецот се очекува да асистира, а од 24-годишниопт нигериски напаѓач кој претходната сезона постигна 15 гола во Германија да продолжи во одлично светло и во Англија.
Чејк Дукуре – од Ленс во Кристал Палас
Ленс претходната сезона беше сензација на француското првенство, а еден од најзаслужните за тоа беше Чејк Дукуре. Дефанзивецот од Мали е силен во дуелите и врши добар притисок на топка, а се очекува да биде клучен играч во одбраната на лондонскиот тим во новата сезона.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
