Поранешниот шпански фудбалер Франциско Хавиер Де Педро е осуден на девет месеци затвор. Некогаш важниот играч на Реал Сосиедад за „фуријата“ играше 12 пати и постигна три гола, но сега има проблеми со законот. Во текот на 1990-тите и 2000-тите, тој беше еден од подобрите шпански играчи од средниот ред.
Де Педро од понеделникот е во затвор во Гипускоа, каде отслужува деветмесечна казна за семејно насилство. Имено, полицијата го фатила на неговото работно место, во ресторан. Судот издаде налог за претрес на неговите простории откако жена го пријавила за злоупотреба и малтретирање. Инаку, полицијата го следела со недели, а тој во тој период неколку пати ја менувал адресата за да избегне апсење. Жената тврди дека тој ја нападнал, дека ја удрил и притоа ја повредил.
Судот во Сан Себастијан нареди на поранешниот фудбалер да му биде забрането да и се приближува на жртвата на најмалку 300 метри една година и четири месеци.
Ова не е првпат Де Педро да има проблеми со законот, во 2009 година беше фатен пијан зад воланот, дува 0,76 промили. Во јули 2010 година, Де Педро беше осуден на 51 ден општествено корисна работа поради закани на својата поранешна партнерка, додека во 2018 година беше уапсен поради напад на својата партнерка, но беше пуштен на условна слобода.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
