Ни трибинската поддршка од Лино Червар, ни домашниот терен не беа доволни за Металург да ја прекине поразителната серија во Лигата на шампионите. Во последниот натпревар на домашен терен од годинашната сезона во ЛШ, „металурзи“ загубија од Мотор Запорожје со 22-30. Во завршното коло од групната фаза, Металург на 2 декември ќе гостува во Лисабон против Спортинг. За Металург ова е вкупно шести пораз во девет одиграни натпревари во групната фаза кој на едно коло пред крај го спушта македонскиот вицешампион на дното на табелата во групата Д.
Иако пред натпреварот од таборот на Металург најавуваа реприза од првиот меч во Украина во кој освоија бод против Мотор (28-28), на теренот во СЦ „Борис Трајковски“ беше друга слика. Украинскиот тим уште од стартот воспостави контрола на играта и на резултатот и во сите сегменти потврди дека е голем фаворит во овој дуел со Металург. Александар Јовиќ стартуваше со ризичните „7 на 6“ во нападот, но од Мотор подготвено одговорија на очекуваната игра на домаќинот и брзо дојдоа до убедли 5-1. Тоа им донесе доминација уште на стартот и најава дека Украинците максимално сериозно се подготвиле за овој возвратен дуел против Металург со кој го потврдија второто место во групата и пласманот во следната рунда.
Александар Јовиќ со неколку ротации се обидуваше да го најде вистинскиот состав и да одговори на темпото што го наметна противникот. Но, Металург тешко успеваше да се справи со мотивираниот гостински состав кој со сигурна игра успешно ја одржуваше предноста од 4-5 гола. Металург во последниот напад од првиот дел не искористија зицер ситуација, а Мотор казни со погодок од далечина за 11-16.
Во второто полувреме Металург се обиде со мобилна игра во одбраната и со подлабока зона да ги исфрли од игра бековите на Мотор Запорожје, а на тоа се надоврза и голманот Дарко Арсиќ со три одбрани во серија. Но, сигурната игра во одбраната, не беше ефектуирана и со ефикасност во нападот. Металург не искористи неколку шанси, меѓу кои и седмерец, да намали на три гола разлика. А, Мотор знаеше тоа да го казни и со неколку лесни голови да се одлепи на 13-22. Металург за 13 минути постигна само два гола, премалку за да може да му парира на противник како Мотор Запорожје и далеку од шанса да направи пресврт.
Александар Гуглета конечно ја прекина лошата серија на „металурзи“ постигнувајќи погодок за 14-22, но убедливата предност и комплетната доминација до крај остана на страната на гостинскиот тим. Во последната четвртина, Мотор влезе со двоцифрена предност зголемувајќи ја разликата на 15-25 и до крај рутински и без поголем отпор од „металурзи“, го потврди триумфот.
Дарко Димитриевски постигна пет гола од пет обиди, четири запиша Халил Јагањац, а по три гола за Металург реализираа Жарко Пешевски и Александар Гуглета. Кај Мотор Запорожје најефиканси беа Артем Козакевич со пет и Алексеј Шинкел со четири гола.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
