Фудбалерите на Манчестер Јунајтед во понеделникот вечерта го одиграа последниот натпревар на домашниот „Олд Трафорд“ во сезоната 2021/2022. Со убедлив резултат го победија Брентфорд, а тој дуел беше збогување за некои играчи кои на лето ќе ги напуштат „црвените ѓаволи“, меѓу кои и српскиот играч за врска Немања Матиќ.
На крајот од сезоната му завршува мандатот на „привремениот“ менаџер Ралф Рангник, кој ќе го наследи Ерик Тен Хаг, а многумина веќе почнаа да шпекулираат што ќе биде со легендарниот напаѓач Кристијано Роналдо.
По мечот, новинарите го прашаа Рангник, кој наскоро ќе стане селектор на Австрија, што мисли за опростувањето на Роналдо со Јунајтед.
„Зошто би се збогувале со Роналдо? Тој има важечки договор и колку што знам ќе биде со нас и следната сезона“, изјави Ралф Рангник по дуелот со Брентфорд.
Кристијано Роналдо (37) се врати во Јунајтед на почетокот на сезоната по 12-годишно отсуство од Манчестер, период во кој ги носеше дресовите на Реал Мадрид и Јувентус и го „зацементира“ статусот на еден од најдобрите играчи во историјата на фудбал. Неговиот договор со Јунајтед истекува во јуни 2023 година, а договорот предвидува можност за продолжување на соработката за уште една година.
До крајот на Премиер-лигата на Јунајтед ги очекува гостување кај Брајтон и Кристал Палас.
Ralf Rangnick on Cristiano Ronaldo: “Why should he say goodbye? He has another year of contract, as far as I know Cristiano will be here next season”, he told @stadiumastro. 🔴 #MUFC
— Fabrizio Romano (@FabrizioRomano) May 3, 2022
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
