Струга ТЛ не го дава врвот, Шкупи ремизираше во Струмица, „петарда“ на Силекс, „лавовите“ го освоија Кавадарци (ВИДЕО)

Екипата на Струга ТЛ не го дава врвот во Првата македонска фудбалска лига триумфирајќи со 0-1 на гостувањето против Работнички во 24. коло. Сето тоа дополнително искористено за повторно зголемување на предноста на врвот пред Шкупи кој ремизираше (1-1) на гостувањето против Академија Пандев во Струмица.

Екипата на Шкупи и покрај тоа што играше со играч помалку од 27. минута со предност од 0-1 го заврши полувремето на гостувањето против Академија Пандев. Чаирчани останаа со играч помалку по грубиот старт на Али Адем во 27. минута за што заработи директен црвен картон.

Но, и покрај тоа, во 31. минута Шкупи дојде до предност од 0-1 со голот на Гаги Маргвелашвили кој прецизно стрелаше од непосредна близина по нафрлањето на Алварез од десната страна од слободен удар.

Но, во 79. минута од средбата Академија Пандев успеа да израмни со голот од пенал на Кристијан Велиновски кој предизвика и тензии меѓу двете страни.

Лидерот Струга ТЛ до триумфот на гостувањето против Работнички во Скопје дојде со голот на Малески уште во 28. минута.

Дека ова беше коло на гостите кои ја оправдаа фаворитската улога потврди и Силекс кој победи со 1-4 на гостувањето против прилепска Победа. Кратовци поведоа  со голот на Хамза Рамани уште во 6. минута од натпреварот.

А, на 0-2 зголеми Виктор Серафимовски во 44. минута.

Во второто полувреме во 47. минута домашни успеаја да намалат на 1-2 со голот на Ване Јованов.

Но, тоа беше се од Победа, а Силекс со голот на Давид Манасиевски во 75. минута зголеми на 1-3. Марко Ѓорѓиевски со два гола, во 90. минута и во 92. минута ги постави конечните 1-5.

И Македонија ЃП го заокружи гостинското коло со триумфот од 0-1 против Тиквеш. Најубавиот гол на денот беше дело на Самир Фазли кој во 68. минута извонредно ја заокружи прекрасната акција на „лавовите“.

ПМФЛ -24. КОЛО
Струмица: АК. ПАНДЕВ – ШКУПИ 1-1
Велиновски 79′ (п) – Маргвелашвили 31′
Прилеп: ПОБЕДА – СИЛЕКС 1-5
Јованов 47′ – Рамани 6′, Серафимовски 44′, Манасиевски 75′, Ѓорѓиевски 90′, 90’+2
Скопје: РАБОТНИЧКИ – СТРУГА ТЛ 0-1
Малески 28′
Кавадарци: ТИКВЕШ – МАКЕДОНИЈА ЃП 0-1

Фазли 68′

УТРЕ (15 ч.)
Скопје: СКОПЈЕ – ШКЕНДИЈА
БРЕГАЛНИЦА – слободна