ТФТ стигна до втората победа во Првата кошаркарска лига откако на домашен терен во 4. коло славеше против Еури Никел со 90-78. Стартот на мечот им припадна на гостите, но ТФТ одговори расположено зад линијата за три поени каде реализираше 15 обиди, направи значајна преднсот и истата не ја испушти до самиот крај.
Отварањето на натпреварот беше во знакот на Еуро Никел кој погоди во првите пет од шест обиди од поле, а имаше и мирна рака од линијата за слободни фралања за предност од 5-12, но како што одминуваа минутите ТФТ успеа да го најде својот ритам во нападот. Брзата игра носеше отворени обиди кои кошаркарите во „црно-бело“ успеаја да ги искористат па со шест погодени „тројки“ во првата четвртина не само што ја анулираа негативата туку и поведоа со 28-23. Напаѓачкиот ритам на избраниците на Смилковски продолжи и до крајот на првото полувреме во кое и покрај тоа што опадна реализацијата за три поени, домашните кошаркари беа на врвот на задачата за заштита на рекетот. ТФТ дозволи само 12 поени во втората четвртина, а со „два за еден“ во последните 30 секунди поведе и со највисоките 56-35.
Еуро Никел одговори со подобра одбрана на отварањето на второто полувреме, но и кошаркарите на домашниот состав беа на врвот на задачата. Двата тима ги спречија лесни поени на противникот, а до крајот на 30. минута ТФТ беше тој што успеа само минимално да ја зголеми предноста за 72-53. Последните десет минути беа само формалнсот во која шанса добија и младите кошаркари на двата тима, а до крајот кавадарчани го ублажија поразот.
Со 20 поени лидер на ТФТ беше Андерсон, додека него го следеше Костоски со 16 поени и 4 скока. Со 12 поени мечот го заврши Зафиров. Николовски со 16 поени и 5 скока беше прво име кај Еуро Никел, 15 додаде Планиниќ, а како двоцифени со 13, односно 12 мечот го завршија Џекиќ и Соколов.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА