Оливие Жиру потврди дека сериозно размислува на заминување од Челси откако го загуби првотимскиот статус со доаѓањето на Френк Лампард на менаџерската функција. Новиот стратег му даде шанса на младиот Абрахам, прва резерва е Батшуаи, а Жиру како трета опција во нападот се соочува со сериозен ризик да биде изоставен од списокот на француската репрезентација за ЕВРО 2020.
„Да бидам искрен, тешко дека ќе останам во клубот. Не можам да си дозволам да продолжам да бидам резерва пред ЕП 2020. Ќе зборувам со тренерот и верувам дека ќе најдеме опција од која сите ќе бидат задоволни“ – изјави Жиру.
Интер покажува сериозен интерес, но Французинот и таму би бил резерва крај Лукаку и Мартинез, поради што многу пореално е враќање назад во татковината во клуб што би му гарантирал првотимски статус.
„Има заинтересирани клубови, а камбек во Франција дефинитивно е една од опциите. Сепак, не можам да кажам ништо конкретно додека не разговарам со Лампард и со челниците на Челси“ – истакна Жиру, кој во 2012 година го предводеше Монпелје кон титулата во францускиот шампионат.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
