Јаник Синер се пласираше во четвртфиналето на Вимблдон откако со извонредна игра успеа да го елиминира Карлос Алкараз, совладувајќи го шпанското „чудо од дете“ со 3-1 во сетови. Синер беше одличен од самиот почеток, поведувајќи со 2-0 со импресивно издание во првите два сета (6-1, 6-4). Тој испушти 0-40 на самиот старт од третиот сет, по што Алкараз успеа да се консолидира. Овој сет беше одлучен во тајбрејк, во кој Шпанецот спаси две меч топки пред да намали на 2-1.
Италијанскиот тенисер сепак не дозволи целосен камбек на противникот, направи брејк во четвртиот сет и ја задржа предноста се до конечните 6-3. Синер во четвртфиналето ќе се сретне со подобриот од вечерашниот меч меѓу Ѓоковиќ и Ван Рајтховен.
Најнеизвесен дуел на денешната програма беше оној меѓу Гофан и Тиафое, на кој белгискиот тенисер се врати од негатива од 1-2 во сетови и славеше со 3-2, за пласман во четвртфиналето. Негов ривал таму ќе биде деветтиот носител Нори, кој денеска рутински славеше со максимални 3-0 над Американецот Пол (6-4, 7-5, 6-4).
Германката Татјана Марија продолжи со одличните настапи на женскиот дел од турнирот, елиминирајќи ја Остапенко со 2-1 во сетови. Подвигот на 34-годишната Германка е уште поголем ако се знае дека Остапенко имаше две меч топки, но Марија успеа да ги одбрани и потоа во решавачкиот сет да триумфира со 7-5. За Марија ова ќе биде прво гранслем четвртфинале во кариерата, каде Германката ќе се сретне со сонародничката Нимајер, која денеска славеше над Вотсон со убедливи 6-2, 6-4.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
