Енис Барди имаше извонредна дебитантска сезона во „Ла Лига“, но по серијата од девет прекрасни погодоци во ланскиот шампионат тој сезонава се уште е во исчекување на својот прв гол за Леванте. Една од причините е и слабата форма на неговиот тим, кој во последните четири кола забележа едно реми и три порази, но Барди е оптимист дека работите наскоро ќе тргнат во позитивна насока и за него и за Леванте.
„Да бидам искрен едвај го чекам својот прв гол за Леванте сезонава. Се чувствувам добро на физички план, сакам да помогнам да излеземе од овој кризен период и се надевам дека наскоро ќе го постигнам и тој толку посакуван погодок. Желбата е голема, но тоа не е опсесија, пред се сакам Леванте да почне да победува бидејќи знам дека имаме квалитет за такво нешто“ – истакнува Барди.
Неговиот тим минатата недела доживеа катастрофален пораз од Севилја, на домашен терен со 2-6, но во следните пет дена има нешто полесен распоред, најпрвин гостува на Валјадолид, а потоа ќе биде домаќин на Алавес.
„Резултатот беше преубедлив и прави да се заборави дека ние одигравме многу квалитетно во првото полувреме. Секако дека бевме незадоволни по поразот, но тоа ни е само мотив да ги исправиме работите. Следните две средби се многу значајни за нас“ – порачува македонскиот репрезентативец.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА