Барса и Нант со понуди за „тренерот Лазаров“

Кире Лазаров имаше фантастично тренерско деби, предводејќи ја Македонија до триумф на квалификацискиот дуел со светсскиот првак Данска, потврдувајќи дека поседува подеднаков тренерски потенцијал како и ракометната класа што ја потврдува на тереноте со своите настапи во изминатите дваесетина години. Лазаров не крие дека сака да се надоградува и уште повеќе да напредува во тренерскиот занает, а веќе на маса има и две одлични понуди за такво нешто.

Барселона и Нант се клубовите кои сакаат да го доведат Македонецот како дел од стручниот штаб за наредната сезона и веќе испратиле понуди за да го ангажираат Лазаров. Актуелниот договор што Кире Лазаров го има со Нант како играч на оваа екипа истекува на крајот од сезонава, а францускиот клуб сега сака да го задржи Македонецот, но како прв асистент на тренерот Ентрериос. Сличен е планот и на Барселона, каде првиот тренер Чави Пасквал не ја крие желбата да го врати назад Лазаров во каталонската престолнина, како дел од стручниот штаб за новата сезона.

И двете опции се примамливи за македонската ракометна легенда, но Лазаров не ја крие желбата да продолжи да настапува и како играч уште една сезона, финиширајќи ја играчката напоредно со почетокот на тренерската кариера. Капитенот при промоцијата за селектор најави дека во најскоро време ќе одлучи кога и каде ќе ја продолжи кариерата, притоа потенцирајќи дека би сакал да игра уште една година пред и официјално да се збогува со активните настапи, воедно и да биде дел од репрезентацијата за ЕП 2022.

Во секој случај, интересот на врвни клубови како Барса и Нант е доволен доказ за реномето на Лазаров, кој покрај со играчките квалитети отсекогаш импресионирал и со професионализмот, нешто што гигантите ширум Европа максимално го почитуваат.

Се вчитува...