Да се биде најдобар кога е најважно: Ерменски скалп подотвора европски врати

Фудбалската репрезентација на Македонија вечерва (18 часот) на арената „Филип Втори“ го игра вториот натпревар од Лигата на нации. На гости доаѓа селекцијата на Ерменија, која е најголемиот ривал за првото место во групата. Ќе биде тоа директна пресметка за исполнување на целта, што го прави овој дуел можеби и најзначајниот во ова ново натпреварување на УЕФА.

По рутински извршената задача во Гибралтар, селекторот Игор Ангеловски и фудбалерите се свесни дека Ерменија е многу поголем предизвик. Но, и можност да докажат дека оваа генерација конечно може да направи нешто многу повеќе во фудбалска Европа. Сонот е пласман на Европско првенство, а првиот чекор кон тоа е освојување на првото место во групата.

„Ова е најзначајниот натпревар за нас, сметам дека добро го анализиравме противникот и подготвени ќе влеземе во дуелот. Мене ми е важно како ќе функционира мојот тим. Ако функционираме како на претходните натпревари, не гледам причина зошто да не го добиеме овој меч. Барсегјан и Хамбарџумјан играа во Македонија, заедно со Фелипе се најдобрите странци што играле во нашата земја. Но, сега ќе бидеме на спротивни страни. Победникот во оваа Лига Д во нашата група ќе се бара меѓу нас и Ерменија. Очекувам да забележиме позитивен резултат“, вели селекторот Игор Ангеловски.

Капитенот Горан Пандев одигра едно полувреме против Гибралтар, а по водството од 0-2 беше повлечен, да ги сочува силите токму за Ерменија. Тој смета дека доколку Македонија биде на своето ниво, може да стигне до успех.

„Ерменија е квалитетна селекција, но ако ние бидеме на нашето ниво, ќе успееме да оствариме позитивен резултат. Ова е најзначајната пресметка во нашата група и свесни сме за тоа“, истакнува Пандев.

Главен судија на натпреварот ќе биде Австриецот Мануел Шутенгрубер, а ќе му помагаат сонародниците Роланд Бранднер и Роланд Ридел.

 

Се вчитува...