Италијанскиот калчолигаш Интер тргнува во финална акција за реструктуирање на тимот во пресрет на новата сезона во Серија А. Има уште многу непознаници за тренерот Лучијано Спалети, а клубот планира да продаде тројца фудбалери, Стеван Јоветиќ, Џефри Кондогбија и Иван Перишиќ, за кого наддаваат Челси и Манчестер јунајтед.
Досега на „Џузепе Меаца“ пристигнаа Весино, Далбер, Шкрињар, Колидио, Ботха Валеро и голманот Прадели, но допрва се очекуваат главните засилувања. Една од најголемите желби на Интер е Џулијан Дракслер, германскиот интернационалец од редовите на ПСЖ. Проценето е дека тој е помлад, но и поевтин во овој момент од неговиот соиграч од ПСЖ, Анхел Ди Марија. Би можел да пристигне во Милано за околу 50 милиони евра.
На Интер му е потребен и централен дефанзивец, а се разгледува можноста од Манчестер сити да пристигнат Николас Отаменди и Елаким Мангала. За позицијата десен бек приоритет е Жоао Кансело, но за него имаат голема конкуренција во Јувентус и Арсенал.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
