Евролигата на вицешампионот Монако му забрани да регистрира нови играчи и тренери поради кршење на кодексот на најсилното кошаркарско натпреварување.
Одлуката стапува на сила веднаш и ќе трае се додека Дисциплинската комисија не донесе нова одлука за случајот.
„Комисијата за контрола на управувањето (MCC), независна комисија која ги разгледува финансиските резултати на клубовите и нивната усогласеност со релевантните прописи, покрена постапка до Финансискиот панел против АС Монако за прекршување на членовите 32.a), 32.c) и 32.d) од Дисциплинскиот кодекс на Евролигата, во врска со неисполнети обврски, неможност за доставување на потребната документација и недостаток на соработка.
Во исчекување на конечна одлука по ова прашање, Финансискиот панел изрече привремена мерка со која му се забранува на АС Монако да регистрира нови играчи и тренери. Оваа мерка стапува на сила веднаш“, стои во соопштението на Евролигата.
Монако оваа недела го очекуваат гостувања во Белград против Партизан и Црвена Звезда.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
