Македонското борење имаше одличен настап на Медитеранските игри во Таранто, каде нашите репрезентативци освоија три медали и уште еднаш покажаа дека се меѓу главните адути на македонската спортска делегација.
Најголемиот успех го остварија Фати Вејсели и Реџеп Хајдари, кои стигнаа до сребрени одличја во своите категории.
Вејсели во категоријата до 74 килограми се пласираше во големото финале, каде што се соочи со Албанецот Ислам Дудаев. Македонскиот борач во финалната борба беше поразен со 0:4, но сепак заслужено се закити со сребро.
Сличен успех оствари и Реџеп Хајдари во категоријата до 97 килограми. Тој во борбата за златото загуби од Гркот Даурен Куруглиев со 0:6, па мораше да се задоволи со сребрениот медал.
До бронза, пак, стигна Ахмад Магомедов, кој беше особено убедлив во борбата за третото место. Магомедов со технички туш го совлада Габриелен Николони со 10:0 и без дилеми го обезбеди местото на пиедесталот.
Така, македонските борачи во Таранто освоија две сребра и една бронза, со што повторно се потврдија како еден од најуспешните спортови за Македонија на Медитеранските игри.
Одличниот настап во Таранто е уште една потврда за квалитетот на македонското борење и голем мотив за репрезентативците во продолжението на сезоната.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
